محاوله للفهم: سيكولوجية قاذف المولوتوف
القصاص عدل … والعدل حق … القانون وسيلة … و العدل هدف .. ربنا سبحانه وتعالى شرّع القصاص حتى يتحقق العدل … الحق شرّع القانون اللي يحقق العدل.
طيب لو مفيش قانون .. لو مفيش قصاص إيه اللي ممكن يحصل؟ … غياب العدل يحقق الفوضى … والفوضى تؤدي لمزيد من الظلم لمزيد من الأبرياء.
طيب وهل كل اللي بيحدف مولوتوف مش مسجل خطر ولا بلطجي محترف؟ .. لأ طبعاً في بلطجية محترفين .. طيب نعمل إيه علشان نفصل؟
الثورة كانت ومازالت وستظل تحارب الظلم والفساد والإستبداد والطمع والغباء … الثورة دم جري في عروق الجثث الهامدة دبت فيها الحياة .. الثورة حق.
اكتر من الف شهيد والاف من المصابين .. والاف مؤلفه من القلوب المحروقة … هل قام العدل .. هل تحقق القصاص …. وماذا عن الداخلية؟
يعرف حقيقة الداخلية من يعيش في المناطق الشعبية والقرى والنجوع … هي العصا الغليظة .. الجلاد لمن أخطأ … أو صادق أحد أخطأ … والخطأ هنا ليس فعل الجرائم اللي بتهدد أمن المجتمع .. فالجرائم في عرفهم هي التي تمس النظام من قريب ومن بعيد … عزّبوا ملايين .. انتهكوا كرامة ملايين .. قتلوا احلام ملايين .. وختموها بقتل في الشوارع لكل من سولت له نفسه وخرج ليقول لمبارك الطاغيه لا.
ومحدش فيهم اتحاكم او اتحاسب او حتى اتوجه ليه لوم … بالعكس … بدل من اعادة هيكلتهم قام العسكر وبعدهم الإخوان بإعادة تسليحهم … وتكريمهم .. وزيادة رواتبهم .. والطبطبه عند اللزوم .. وتوجيه الشكر كمان.
طيب والدم اللي راح؟ .. مش وقته .. طيب والقصاص؟ .. مفيش في إيدينا حاجة .. طيب إعادة الهيكلة؟ … التمكين أهم
دي مش محاولة للتبرير .. دي محاولة لفهم السيكولوجية .. اللي أخطأ يتحاسب .. وياريت نبدأ باللي عذب وسحل وقتل وانتهك ولابس ميري ومخدش حكم واحد.
غير كده الشباب دول هيفضلوا شايفين الداخلية عدو .. والسلطة عدو … بل والقانون عدو … إلى أن يتحقق العدل.
والله أعلى وأعلم
Filed under فتنه, محاولة للفهم, سياسة
الازدواجيه لا دين لها 18+
الإنسان بطبيعته متناقض .. فيه كل حاجه وعكسها .. زي بلدنا بالظبط … بس فيه ناس كتير بتبهرني بالتناقض والازدواجيه بتاعتهم .. يعني مثلا كتير من أصحابي بيدافعوا عن الفكر السلفي جدا … وتشوف تصرفاتهم ملهاش دعوه بالمنهج ولا بالفكر خالص .. وبعدين لما تزنق حد فيهم يقولك “أحب الصالحين و لست منهم” .. ماشي يا سيدي .. مانتش منهم .. خلاص اتفقنا .. بتقول ليه بقي علي واحد مسلم زيه زيك ده مسلم مايع .. طب وسعادتك إيه؟؟ .. مسلم سكر زياده مثلا؟ .. وكله كوم ولما كنت في الحمام ولقيته عمل حمام ومشي من غير ما حتي يغسل إيده … يخرب بيت كده … مش للدرجه دي يعني.
كل الناس عندها تناقض .. لأن التناقض والازداوجيه سمه بشريه … بس أحيانا بنبهر من نسبة التناقض ده .. يعني الفرق بيبقي 180 درجه تقريبا وده بيلغبطني .. أنا عارف إن الطبيعي إن فيه فجوه بين النظريه والتطبيق .. بس بحدود يعني .. يعني لو النظريه ماسبتش أي أثر في الإنسان أثناء التطبيق ولقيته شخص تاني خالص فيه حاجه غلط تستحق التأمل.
أخر مره واحد بهرني بحجم التناقض والازدواجيه لسه قابلته من كام ساعه .. دخلت في نقاش معاه علي الفيسبوك علي دور المجلس العسكري في الثورة و لاقيته بيجيب أيات من القرآن وأحاديث ليثبت ان الإيمان بالمؤامره من صلب الدين .. و جيش مصر خير أجناد الأرض … الخ .. وبعدين قولت افتح بروفيله علي الفيسبوك واشوف وكانت الصدمه … شخص تاني خالص .. وحاطط كومنتات لبنات اصغر منه بأكتر من عشرين سنه وبصور مايوهات وخلافه .. النوع ده من ازدواجيه بتخليني افقد الثقه في مقدرتي علي فهم البشر .. مين فين إزاي ليه امتي .. ربنا يهدينا كلنا والله .. أنا مش بدور علي مشاكل الناس وبتتبع عوراتهم .. خالص .. بس بحاول أفهم فين الخلل علشان أعرف اعالجه في نفسي إزاي وفي طريقة تربيتي لأبني.
هتلاقوا مقتطفات من حديث الأستاذ اللي معرفوش .. وبعديها صوره من بروفيله:
مقتطفات من حديث الأستاذ اللي معرفوش
بروفيل الأستاذ اللي معرفوش برضه
وعلي فكره هو مش لجنه ولا حد عايز يسوء سمعت مش عارف مين .. اعرفه عن طريق أحد اقربائي علي الفيسبوك .. وهو كمان مش عندي في لستة الأصدقاء علشان أصحابي الفضوليين 🙂
اللهم أرنا الحق حقا وارزقنا اتباعه وارنا الباطل باطلا وارزقنا اجتنابه .. وخفف من ازدواجيتنا.
Filed under كلام, الأستفزازات اليوميه
بعض الأسئلة عن حرق المجمع العلمي (اللي أول مره أسمع عنه) #NOSCAF
زعلنا كلنا علي حرق المجمع العلمي لما يحتويه من كتب ووثائق تاريخيه .. بس زعلنا أكتر علي الدم اللي سال …. زعلنا أكتر وأكتر من السلطه اللي مستعده تحرق البلد واللي فيها مقابل مصالحها الضيقه … علي كل حال أهو اتحرق واللي كان كان .. بس عايزين نسأل شوية اسئله يمكن نفهم مين حرقه:
* إزاي خبر حرق المجمع العلمي يتنشر قبلها بيوم علي قناة الفلول سي بي سي (اللي بتدس السم في العسل بقيادة لميس الحديدي وخيري رمضان)؟ الفيديو هنا
* مين اللي كانوا فوق المبني وهو بيتحرق وبيحدفوا علي المتظاهرين طوب وازايز ومين اللي طلعهم؟
* أقرب نقطة اطفاء للمجمع علي بعد 100 متر .. مين مسئول إن المطافي ماتتحركش الا لما الحريق تجهز علي المبني باللي فيه؟
* لما مجلس الشعب اتحرق طلعت طائرات هليوكبتر تطفي الحريق … ليه المجمع اتساب كل الفتره دي؟
* إزاي عناصر التأمين تحمي المباني الفاضيه (مجلس الوزرا ومجلس الشعب ومجلس الشوري) وتسيب مبني زي المجمع العملي بدون أي حمايه؟
* بشهادة أمين المجمع الشباب (اللي كان بيحاربهم عناصر التأمين وبيرموا عليهم طوب) ساعدوا في اطفاء الحريق وكانوا بيرموا نفسهم في النار علشان ينقذوا الكتب .. إزاي بيخربوا المؤسسات وبينقذوا الكتب؟ الفيديو هنا
* ليه بعد حرق المجمع كل الإعلام الفلولي (الفراعين و سي بي سي و كل قنوات ماسبيرو) بيتكلموا “بس” عن الخسائر الماديه ويهمشوا قضية قتل الثوار وسحلهم؟
* ليه قطاع الأخبار ينبه علي المذيعين في ماسبيرو يتكلموا عن الخسائر الماديه بس؟ .. ودي شهادة نرمين البنبي (مذيعه في راديو مصر) علي تويتر
* اخر سؤال: مين اللي صور الفيديو اللي في الرساله رقم 90 لو هو تبع الإعلام العسكري أو التحريات العسكريه اللي تبع المخابرات الحربيه … يبقي أكيد كان فيه عناصر من المخابرات وسط المتظاهرين … هل المخابرات ماكنتش هتعرف تمنع حرق المجمع؟
حاول تجاوب علي الأسئله دي وفكر فيها بمنتهي الهدوء .. شوف مين من مصلحته ابقاء الوضع مشتعل … شوف مين اللي فشل في ادارة البلد … شوف مين اللي كرّه الناس في الثورة … شوف مين بيدعم توفيق عكاشه والحشد اللي بيعمله في العباسيه … هو بتوع العباسيه هتفوا امبارح لمبارك ليه؟ … مين اللي أشاد بأداء الإعلام المصري بعد احداث ماسبيرو علي رغم تحريضه الصريح ضد المسيحيين في مصر ….. مين اللي بيزرع الفتنه وسطينا؟
اللهم أرنا الحق حقا وارزقنا اتباعه … وأرنا الباطل باطل وارزقنا اجتنابه.
الإشتراكيين الثوريين والإخوان .. عشرة كفاح .. وفي الآخر بلاغ
قبل ما هتكلم في أي حاجه .. ده الفيديو اللي بسببه قامت الدنيا ومقعدتش علي الإشتراكيين الثوريين:
بس يا سيدي .. أول ما الفيديو ده انتشر قامت حرب شعواء علي الإشتراكيين الثوريين .. أنا مش اشتراكي تنظيميا ولكن “اميل” الي الفكر الإشتراكي .. ومعظم الشباب الإشتراكي اللي عرفتهم وطنين جدا ومخلصين بجد للبلد دي .. اختلف معاهم في حاجات كتير .. لكن ماشكتش في لحظه في ولائهم ولا حبهم للوطن وخصوصا فقرائه وكادحيه.
أنا مختلف تماما مع الرفاق في استخدامهم مصطلحات زي “اسقاط الدوله” .. “انشقاقات الجيش” .. “هدم المؤسسه العسكريه التي تدافع عن مصالح الرأسماليين” .. “مازال هناك دم لابد ان يدفع” .. بغض النظر عن اختلافي مع بعض الأفكار .. ادرك ان المعني من اسقاط الدوله هو اسقاط دولة الفساد وبناء مؤسسات أكثر عدلا .. بس خانهم التوفيق في التوقيت تماما … العسكر نجحوا يكرهوا الناس في الثورة .. و المصريين بطبيعتهم فلاحين .. يعني يدفعوا الدم علشان الأرض والشرف .. بس أي حاجه تانيه ممكن يستنوا عليها وتيجي بالتدريج … المصريين اصلاحيين بالفطره. يبقي الكلام ده هيخسّر أكتر ما هيكسّب .. هيساعد المستبدين أكتر ماهيساعدنا .. وده اللي حصل وتم الترويج للكلام ده اعلاميا لتشويه الثورة والثوار.
وبعدين حصل اغرب حاجه ممكن اتخيلها .. لقيت د.جمال تاج الدين عضو في جماعة الإخوان مقدم بلاغ في ثلاثه من الإشتراكيين الثوريين (منهم سامح نجيب المتحدث في المقطع السابق) .. مفاجأه بالنسبالي علشان كنت متخيل إن الخطوه دي هيعملها العسكر .. مش الإخوان … وبعدين شوفت الصفحه الأولي لجريدة “الحريه والعداله” الجريده الرسميه لحزب الحريه والعداله الذراع السياسي لجماعة الإخوان المسلمين:
عنوان الجريده معناه إن الإخوان باعوا الإشتراكيين الثوريين وبعقل واعي بيفتتوا القوي الثورية قدام العسكر .. وبغض النظر عن البلاغ هم أصدروا الحكم وبينفذوه .. ومن الطريف إن أكتر ناس كانوا بيدعموا الإخوان ضد المحاكمات العسكريه لأعضائها أيام العصر البائد هم الإشتراكيين الثوريين .. ولكن كان موقف الدكتور البلتاجي القيادي بحزب الحريه والعداله وجماعة الإخوان المسلمين مشرف وأصدر هذا البيان علي صفحته علي الفيسبوك:
الفكر يواجه بالفكر وليس ببلاغات النيابة ولا بمحاكم التفتيش. والاختلاف بين شركاء النضال السياسي يجب ألا يتحول لعداوة وخصومة. أختلف شكلا وموضوعا مع أطروحة تفكيك المؤسسات التي يتبناها البعض وأرى أن التطهير الذي لا يزال شعارا للثورة هو الصحيح. أختلف كثيرا مع أفكار سامح نجيب وكمال خليل لكني أقدر نضالهم الوطني لسنين طويلة شاركنا فيها معا . نحتاج لحوار ونقاش يفيد الوطن وليس لإتهامات ومعارك تمزق الوطن ~ محمد البلتاجي
من الواضح إن احنا هنقابل مفاجآت كتير لم نكن نتوقعها .. لكني أتمني ان يعود الكل لرشدهم ويصطفوا خلف الثورة ومطالبها واستيعاب الكتله الثورية الحرجه من أجل الخروج من هذا المأزق.
آدي يا سيدي موبينيل اللي كنت بدافع عنهم #Egypt @Mobinil
عندي خط موبينيل حصلت مشكله في تجديد باقة الإنترنت عند التجديد .. و المشكله زي ما عرفتها بعد كده انه مكنش فيه رصيد كفايه لتجديد الباقه فا وقِّفُوها من غير ما يبعتولي أي تنبيه إن الباقه مش هتتجدد و إنهم هايحسبوني بالتعريفه العاديه (أول ميجا بـ جنيه و بعد كده الميجا بـ 5 جنيه) .. و طبعا كل ما أشحن أي رصيد يتدمر .. طبعا ماكنتش عارف الحوار ده فا قولت اتصل بـ خدمة العملا .. اتصلت الساعه 6:47 PM و رد عليه واحد اسمه “سامي كامل” تقريبا .. حاكيتله المشكله و قالي استني اشوف علي السيستم .. و بعدين حكالي القصة بتاعة إن مكنش عندي رصيد كفايه .. قولتله طب كان المفروض السيستم يبعلتي أي تنبيه يحذرني و يقولي كده .. قالي لأ علشان ده سيستم .. أنا كنت منفعل جدا و الولد كمان بدأ ينفعل .. قولتله طب أنا عايز أصعّد الموضوع و أعمل Complaint “شكوي” قالي ماينفعش .. قولتله يعني إيه ماينفعش أنت مالكش دعوه .. أنت تخليني أبعت شكوتي وبس .. قالي يعني إيه ماليش دعوه أنا بقولك ماينفعش .. قمت قافل السكه في وشه و قولت هسأل أي حد يقولي إزاي أبعت شكوي و حدثت المفاجأة …..
بعد ما قفلت معاه علي طول قعد يتبعتلي سبام رسائل MMS و Push Messages
و موبيلي بقي يخش اوتوماتيك علي الإنترنت و طبعا عمل كده علشان يخلصلي الرصيد و “يعاقبني” .. قفلت التليفون مرتين و كل ما افتحه الاقي سيل من السبام و مش عارف حتي أعمل منه أي اتصال. و دلوقتي الساعه 9:53 بحاول أعرف رصيدي بقي كام بيظهرلي رساله بتقولي You are currently susbended. و الساعه 10:42 دقيقه رجعلي تاني السبام.
يعني إيه بني ادم زي ده يكون شغال في شركه كبيره وكمان في خدمة العملا .. و يعني إيه يقولي ماينفعش تبعت شكوي .. و يعني إيه بمنتهي الثقه يبعتلي سبام و هو مش خايف إني اشتكيه .. يعني إيه كنت شغال في لينك دوت نت و أكلم كل صحابي علشان أصعّد الموضوع و معرفش استخدم تليفوني لحد دلوقتي (عدي حوالي 3 ساعات) ..
يعني أنا أكون من الناس اللي ادافع عن موبينيل و اقول بلاش نقاطعها و ماينفعش نوقع شركة مصريه يعملوا فيه أنا كده … أنا حزين جدا والله .. مش حزين علي الكام جنيه اللي ضاعوا مني بسبب الشخص ده … أنا زعلان إن ده يحصل من شركه قعدت ادافع عنهم و اتشتم بسببهم من الناس و اقول معلش أنا بدافع عن شركه مصريه أصحابها مصريين و لازم ماتقعش … بس الظاهر إني كنت غلطان و إن هم نفسهم مش فارق معاهم المصريين اللي بيمصوا دمهم.
و في الآخر الممثل بتاعهم علي تويتر باعتلي بيقولي أكيد ده مش مقصود .. و أكيد برضه اللي حصل ده مش صدفه … و أكيد برضه فيه تفسير للي حصل و ممثل خدمة العملا ده ليه يد في اللي حصل … و تخيلوا إن لحد دلوقتي محدش من موبينيل عايز يقولي أقدم شكوي إزاي … أنا هديهم فرصه 24 ساعه .. لو محستش إني خدت حقي هقدم شكوي في الجهاز القومي لتنظيم الإتصالات 155 .. و الأهم انهم هيخسروا عميل.
______________________________________________________________________________________________
تحديث: 16 نوفمبر 2011
حد من موبينيل كلمنى إمبارح و إعتذرولى و قالولى إنهم عاقبوا الولد و إنهم هيعوضونى عن الرصيد ، أنا قلتلهم أنا دلوقتى عندى مشكلتين كبار و مشكله صغيره ، مشكلة الرصيد و دى المشكله الصغيره ، المشكلتين الكبار أول واحده فيهم إزاى حد فى شركه كبيره زى دى يقرر إنه يبعت سبام لعميل لمجرد إنه شد معاه فى التليفون و يعمل كده بمنتهى الثقه ، و اللى أنا واثق منه إنه أكيد عمل كده أكتر من مره بس المره دى وقع مع الشخص الغلط ، تانى حاجه إزاى موبينيل تقرر إنها تحاسبنى بتعريفه مختلفه من غير ما يبعتولى أى تحذير ، يا راجل ده لما بيبقى رصيدى أقل من جنيه بتبعتوا “من فضلك إشحن رصيدك” ، إيه أم الإزدواجيه دى.
هم قالولى إن بخصوص الولد إتاخد ضده إجراء قاسى و إنه مش هيتعامل مع عملاء تانى أبداَ ، و إنهم هيضمنوا إن اللى حصل مايتكررش مع أى عميل تانى ، بس فشلت إنى أخليهم يقولولى إيه هو الإجراء ده ، بس ده برضه إعتراف ضمنى منهم إن الولد فعلاً هو اللى بعتلى السبام. و قالولى إنهم هيبعتوا الطلب بتاعى علشان يتعمل فى السيستم و يبعت تحذيرات للناس لو هيتحاسبوا بتعريفه مختلفه غير اللى هم متوقعينها ، و قولتلهم أنا هستنى شهر و أشوف ، ولو ماتعملتش ممكن أبدأ فى حمله ضد الشركات التلاته علشان يبقوا أكتر شفافيه مع العملاء و يبطلوا شغل مص الدم.
المهم فى الموضوع ده إن إحنا مانسكتش تانى ، لو أى حد حصل معاه أى حاجه يشارك الناس بيها ، و يعملهم هيصه وزيطه لحد ما ياخد حقه وحق الناس كلها ، أيوه إنت لما بتاخد حقك من شركه غلطت فيك إنت بتاخد حق الناس كلها علشان هم مايكرروش الغلطه دى مع حد تانى.
رساله إلى كل مقدمى الخدمات فى مصر: إمشى عدل يحتار عميلك فيك ….. إحترمونا يرحمكم الله
Filed under U
حتى أنت يا شروق … إنضفوا يرحمكم الله
قريت خبر الصبح يعتبر مثال آخر على إفتقار المهنيه الصحفيه فى صياغة الخبر و عنوانه، العنوان بيقول “رئيس (الوسط) يتهم الليبراليين واليساريين بأنهم غير أمناء على البلد” و فى الخبر نفسه قايلين على لسانه:
“واتهم «ماضى» النخب السياسية التى تدعى الليبرالية واليسارية بأنها غير أمينة على مصلحة البلد متهما إياهم بأنهم يعتقدون بأنهم يفهمون كل شىء والشعب لا يفهم، ويشكون فى اختياراته، مضيفا أنهم يريدون من المجلس العسكرى تسليم السلطة وإبعاد الإسلاميين فى نفس الوقت، على حد قوله. جاء ذلك خلال مؤتمر انتخابى عقده حزب الوسط بحى المسلة بمدينة الفيوم، مساء أمس الأول، بحضور أمين عام الحزب بالمحافظة، الدكتور حسين ياسين، ومرشحى الحزب بالدائرة الأولى ومقرها بندر الفيوم.”
. و الكلام كان فى سياق النقد لوثيقة السلمى بتاعة المبادىء الفوق دستوريه ، يبقى أكيد يقصد بالنخب العلمانيه و الليبراليه اللى وافقوا على الوثيقه: السيد البدوى و رفعت السعيد و أسامه الغزالى حرب ، بس طبعاً الصحافه تحب تشعللها و تولعها حبتين ، وده طبعاً نسف مصداقية الخبر بالنسبالى ، ممكن مايكونش الراجل قال كده من الأساس ، أو قال بصيغه تانيه و الصحفى حوّر الكلام ، و بعدين اللى ضايقنى أكتر إن الشروق اللى كنت بعتبرها أكتر جريده عندها مصداقيه يبقى ده مستواها ، عايزين إعلام نضيف بقى …… إنضفوا يرحمكم الله.
كل اللى حصل فى ماريناب ده إشاعه … فيه ناس عايزه تصدق كده #Maspero #Maspiro
ظهر فيديو على الفيسبوك للأنبا هيدرا بيؤكد فيه إن كل شى بخير فى أسوان و كنيسة الماريناب سليمه و زى الفل ، و اللى بيروج للفيديو ده على الفيسبوك بيستخدمه علشان يثبت إن اللى حصل ده كله بسبب “إشاعه” … و تجاهل كل الصحافه اللى إتكتبت فى الموضوع ده ، و تجاهل كلام محافظ أسوان نفسه على الكثير من الفضائيات اللى أكد فيه الموضوع ، و تجاهل فيديو المستشاره نهى الزينى اللى كانت فى لجنة تقصى الحقائق و اللى رفعت توصيه للمجلس العسكرى بضرورة إقالة محافظ أسوان ، و طبعاً المجلس مش فاضى للكلام ده و نفضلهم.
من غير تطويل أنا مقدرتش أقتنع بالكلام ده ، و دورت على المقطع بتاع الأنبا هيدرا على يوتيوب علشان اشوف الفيديو ده إترفع إمتى ، لقيته إترفع بتاريخ 20 سبتمبر 2011 ، و دورت على خبر أحداث الماريناب كانت إمتى ، و لقيتها على مواقع كتير بتقول إن الناس هجموا على الكنيسه يوم 30 سبتمبر 2011 (و ده الخبر على بوابة الشروق) … يعنى تقريباً بعد فيديو الأنبا هيدرا بـ 10 أيام.
ناس كتير عايزه تصدق إن اللى حصل ده إشاعه و تنسفه من الأساس علشان تريح نفسها و ماتخدش موقف واضح و صريح ، اللى حصل ده جريمه فى حقنا كلنا ، سوء إداره (و إحتمال سوء نيه) من القائمين على إدارة البلاد.
من أكتر المقالات اللى عجبتنى فى تحليلها للأحداث الأخيره ، مقاله ل عمر طاهر إسمها الإختيار ، كان منصف مع الكل برضه ، رصد سلبيات و كلام تحريضى من رجال دين مسيحيين و مسلميين ، و دور الإعلام الرسمى فى التهييج و الفتنه ، و فشل المجلس العسكرى فى إحتواء الموقف.
و أنا بقى هجاوب على السؤال اللى بيشغل كتير من الناس: مين اللى بدأ أحداث ماسبيرو؟؟
الإجابه هى: معرفش
بس أعرف كويس قوى مين اللى تباطىء و تخاذل فى تحقيق العداله و إحتواء ما حدث فى أسوان ، و أعرف كويس قوى مين سمح لإعلام دوله يحرض الناس على بعض و يطلع المصابين بيشتموا فى المسيحيين ، و أعرف كويس قوى الشيوخ اللى بيحرضوا على الفتنه ، و أعرف كويس قوى القساوسه اللى حرضوا الناس على الفتنه برضه ، و أعرف كويس قوى اللى طلّع المدرعات تجرى ورا الناس زى المخابيل ، و أعرف كويس قوى اللى سكت على فلول الصعيد لما هددوا وحدة الدوله لو إتفعّل قانون الغدر ، و أعرف كويس قوى اللى ماقدمش مجرمين أحداث إمبابه للعداله ، و أعرف كويس قوى اللى مش عايز ينزل الشارع و يشوف شغله و يلم البلطجيه.
أعرف حاجات كتير قوى تخلينى ماسكتش و أقول “أنا مش هقول حاجه إلا لما أعرف مين اللى بدأ” ، إصحوا يا ساده ، خليكوا منصفين ، النهارده المسيحيين ، بكره السلفيين و بعده الأخوان ، لو سكتنا عن اللى بيحصل الدور هيبقى علينا قريب.
لازم نحافظ على سلمية الثورة ، و ماينفعش نسكت و نقعد فى البيت و نسيبهم يعكوا و يلعبوا بينا ، هنكمل ثورتنا فى كل حاجه لحد ما يسقط النظام و نبنى نظام جديد عادل.
الموضوعيه تقتضى أن تكون منصفاً مع الكل.
كتاب أرهقني أيام طفولتي: الأدله الماديه علي وجود الله
لما بشم رائحة المسك في المسجد بنشرح قوي و بفتكر أيام الطفوله .. أيام ما كان الواحد ايمانه خالص مش محتاج لأي براهين ولا اثباتات عقليه .. كان حب الله و الإيمان بيه شيء فطري كده .. زي البوصله لما تحطها في أي مكان ابرتها تتجه لمكان بعينه .. فطرة الروح برضه في هذه الأيام كانت تتجه الي الله بدون أي مجهود ذهني أو عقلي …. حب خالص و ايمان نقي.
عارفين أنا أول كتاب اتصدمت فيه كان اسمه إيه؟ .. كان كتاب اسمه “الأدله الماديه علي وجود الله” للشيخ محمد متولي الشعراوي .. و قعدت كام يوم مانمش بسببه و اسال نفسي .. أدلة إيه دي اللي هنبرهن بيها نحن البشر علي وجود الله .. وكمان أدله ماديه .. لم أستطع أن أفهم لماذا ندرس هذا الكتاب من الأساس .. كيف نستخدم براهين و اثباتات ماديه دنيويه نسبيه لنثبت به وجود المطلق سبحانه و تعالي.
و كانت المفاجأه و الطامه الكبري التي كسرت قلبي الصغير حينها .. مش كل البشر بيؤمنوا بالله .. إزاي ده و ليه و إزاي ربنا ساكت عليهم .. فطرتي و نقائي الطفولي لم يستوعب هذه الحقيقه المره.
في المراحل المبكره من الأفضل التركيز علي الروح و تقوية الشعور الجميل بـ لإيمان بالله .. حاله صوفيه طفوليه .. نركز علي التقوي و الإخاء و كل السلوكيات و الأخلاقيات اللي بينادي بيها الإسلام و يؤمن بيها معظم البشر المسلمين منهم و غير المسلمين .. و التقليل من التركيز علي العقل اللي ممكن يشوه الفطره الجميله اللي بتكون في السن ده.
الكتاب ده مش قادر أنساه لأنه “أرهقني” .. يعني وجود الشجر دليل علي وجود الله . الشيخ الشعراوي كتب الكتاب ده علشان كان خايف من موجات الإلحاد اللي كانت موجوده و بدأت تنتشر وقت تأليفه هذا الكتاب و كان بيحاربها بكل شكل .. بس ده مش للأطفال اللي هم اصلا مش محتاجين براهين و أدله و مؤمنين بالله بشكل فطري. و نبقي ندرس كل الفلسفات دي و الأدلة و كل حاجه في مراحل متأخره شويه من التعليم .. يعني مش قبل ثانوي مثلا.
ياريت نقوي الحاله الصوفيه دي في الأطفال و نخليهم يحبوا ربنا الرحمن الرحيم العدل .. الذي لا يغفل ولا ينام .. الذي يرعي عباده و يصبر عليهم .. يا الله .. لا أتمني اكثر من أعود بفطرتي لأيام الطفوله ..
Filed under أسلاميات, تربيه, ذكريات و خواطر
كلمات غير هادفه – فوتوشوب
قالك كله فوتوشوب … القناصه فوتوشوب … اللى بيضرب فوتوشوب … و اللى بيسحل فوتوشوب … و اللى بيقتل فوتوشوب .. الداخليه فوتوشوب …
قالك ثوره فوتوشوب … طب و الثوار؟ فوتوشوب … حتى الشهدا فوتوشوب … و الغاز دا كمان فوتو شوب … و الخرطوش برضه فوتوشوب … بتقول مطاطى؟ فوتوشوب … و رصاصنا الحى فوتوشوب … الدم دا كله فوتوشوب …
كل حياتنا فوتوشوب … أكل مسرطن فوتوشوب … تعليم بايظ فوتوشوب … و مفيش صحه؟ فوتوشوب … طب و العباره؟ فوتوشوب … و وابور العيد فوتوشوب … و اللى إتحرقوا فوتوشوب … و اللى غرقوا فوتوشوب … و اللى إنتحروا فوتوشوب … و اللى نهبوا فوتوشوب … و اللى إتنهبوا فتوشوب … كل الفاسدين فوتوشوب … حتى الساكتين فوتوشوب … و اللى بينطق فوتوشوب … دولة حسنى فوتوشوب …
الحزب الحاكم فوتوشوب … علشان صفوت فوتوشوب … و حماده عز دا فوتوشوب … و ابن مبارك فوتوشوب … واخدينها تكيه فوتوشوب …
شيلنا مبارك هيلاهوب … من غير خدعه و فوتوشوب … قام المجلس البوب …. ركب الثوره م التوب … بالشرعيه الفوتوشوب …
إمضاء واحد فوتوشوب
Filed under كلمات غير هادفه
اليأس رفاهية 